Baerggebiet, no sone Riis ga ds beschtige. So heimer, das fuer ues schtimmende Angebot, buechet u hei di 4 taegigi Tour gschtartet. Zersch simer mit Sack u Pack, uesem Guide em Jose u schoenem Waetter Richtig Refugio Peru gwanderet. Di Huette isch leider nuem bewartet gsi, so heimer ime chline Zimmerli u sehr fein ussehende Naeschter uesi erschti Nacht verbracht. D Abestimmig isch eifach dr Hammer gsi, d Himmusfarbe hei bau au 5 Minute gwaechslet u d Schtaerne heisech ou vo ihrer beschte Site zeigt. So simer vou Optimismus gsi, dae Baerg choenne ds beschtige. 
Scho am naechschte Morge hets de gli afa raegne u ufem Waeg zu uesem Zaeutlager o afa schneie. Aber das simer ues ja afa gwoehnt heimer daenkt, es chunt de schono besser!! Leider hets naer dr ganz Tag witer
gschneit u uesi Hoffnig ufnes Gipfuerlaebnis het geng wi meh abgno.. Dr Guide ds mindescht isch aber no "guten Mutes" gsi u het ues so uf Mitternacht fuere Ufschtig woue cho wecke. Bis Mitternacht u no lenger, simer du naer 
aber dermit beschaeftigt gsi, ueses Zaut vo Schnee ds befreie u ds luege, dases nid au zu fescht inelaat.. Tja, itz hei ou mir mau Waetterpaech gha u das wo itz scho chli schmaerzt, isch haut "das liebe Geld"! Am naerchschte Morge 
hets du doch o es Bitzi uf ta, so das mir glich no chli ufe Gletscher hei choenne. Si de oeppe bis uf 5400 m.ue.m gloffe 
u hei e ungloublech schoeni Iislandschaft gnosse. Dank em vile Noeischneee, em Naebu u dr Sunne, wo duere Naebu het duere drueckt, hets dert obe ungloublechi Bilder ds gseh gaeh! Aus Ersatz fuere Ufschtig, heimer de no chli Seil - u Rettigstheorie gmacht, ou das isch ja e wichtige Teil bim Baergschtige. Di letschti Nacht heimer de wider im Refugio verbracht u si de am vierte Tag wider zruegg id Zivilisation. Ufem Waeg, heimer no di wunderschoeni Lagune Llanganuco choenne 
gseh.Natuerlech geit ja ou nie oeppis "normal" zue und haer, hei uf dr Rueckfahrt wider mau sone richtig duereknaute Boesfahrer gha. Uesi Ruckseck si wider uf ds Dach glade worde (wi scho im vordere Blog beschribe) u naer, ab die Post. Aus wome het choenne ueberhole isch ueberholt worde u nid emau ir Kurve het me uesi Ruckseck obe druf chli gschonet. Mir hei dr Adrenalinspiegel di ganzi Fahrt wider ds oberscht gha, obwous ja eigentlech scho bau nuem luschtig isch gsi. Tja, saege hiuft ja ou nuet, wueu dr Grund isch ja eifach ds Gaeud. Je schneuer si fahre, je huefiger choeisi d Strecki zrueglege u je meh das si ueberhole, je meh Fahrgaescht choei si eme angere Boesfahrer waegstaehle...
So itz geits de definitiv witer Richtig Suede, d Wandersaison isch definitiv beaendet.
Keine Kommentare:
Kommentar veröffentlichen