Auf in den Dschungel.... (Boesfahre isch cool)

Da mir, wi dir ja wuesst, afa reacht Grueni Cheibe si, heimer daenkt mi neame fuer i Dschungel nid ds Flugi wi aui, sondern goe mitem Boes. Es si ja nume 18 Schtung hets ide Reisebueros gheisse. U so, isches de am Nami am drue losgange. Mit durchschnittlech 20 km/h hets sech uesi Chrutze ueber ne Pass quaelt u nach oeppe 5 Schtung het de naer d Holperpiste Richtig Dschungel agfange. Scho gli mau simer de ds erscht mau blibe schtah, hei du naer erfahre, dass si e noeii Schtrass vo Cusco bis nach Brasilie am boue si u dass mer waege daene Bouarbeite gad nid choei witerfahre. Oeppe am zwoei ir Nacht simer du de fuer chli lengeri Zyt feschtghocket. Bis itz Morgegraue heimer gar nid viu dervo gmerkt, hei herllech pennet. Am Morge heimer de mau erfahre, dass Schtrass vomene Aerdrutsch verschuetet isch. Aber am saechsi soeus witer gah, hets gheisse! Am saechsi haubi sibni si de afa mau d Bouarbeiter itroffe, wo dert di noeii Schtrass am boue si. Mitem Bagger heisi de probiert, d Schtrass wider freizschufle bis de erneut si Steine abecho. Si hei du naer zersch dr ganz Hang vo obenabe vom Schutt muesse befreie u so isch de haut haubi elfi worde, bis mer hei witerchoenne. "Des Einen Leid, des Andern Freud". Di Iheimische, wo uf de Laschtwaege i Dschungel fahre u Laebesmittel derbi hei gha hets gfroeit, si hei ihri Waar zu mega Priise choenne verchoufe, da aui fasch am verhungere si gsi. Dae Spektakel haettet dr soeue gseh...

Voller Froeid simer gsi, da mir hei gwuesst, dasses nume no 6 Schtung geit! Und me gloubts chuum, eh, lueget doch gad saeuber ufem Foeteli.

so soets usgseh

so hets leider usgseh!!!!!!

Uf jede Fall heimer unaendlech Schwein gha, dass das schiss Rad nid no ganz isch abgheit. Nach witere gschlagene 4 Schtung Achs usenang naeh u wider zaemesetzte u aschrube, heimer dr letscht Bitz no i Griff gno. Am Abe am nueni, simer de mit 13 schtuendiger Verspaetig du doch no in Puerto Maldonado acho. Aber d Peruaner hets gloub nid gross gschtoert, hie chasch eifach definitiv niemer us dr Rueh bringe, es heisst de hoechschtens no "no te preocupes" (mach dr ke Sorge) oder "tranquilo" (nume ruehig)!! Wi isch das noeime ir Schwyz? Dr Zug chunt paar Minute ds spaet u aui si scho fasch am Amok loufe.... U es isch doch tatsaechlech no witer gange a daem Abe. Hei uesi Sache im Hotelzimmer deponiert, Tuere bschlosse u si ga aesse. Wider zruegg heimer doch di Tuere nuem ufbracht u d Hotelfrou het aui ihri Hilfsbursche muesse mobilisiere, fuer di Tuer wider ufdstue. O das het sicher nomau e Schtung duuret. Si naer kaputt u fertig ids Bett gheit u si de no mit "naette Naebegruesch" usem Naebezimmer i Schlaf gwiegt worde....

Derfuer heimer huet es guets Dschungelangebot gfunde u froeie ues itz ufe Raegewald!