Richtung Sueden bis nach Cusco

Nach guet 1 1/2 Wuche simer itz hie in Cusco, dr beruehmte Inkastadt, acho. Gfahre simer aus ueber himmuleidi Landwaege, hei auso fuer di guet 1200 km gad emau 35 Schtung reini Fahrtzyt brucht. Natuerlech heimer di Strecki nid i einisch zruegg gleit, sondern hei di verschidene Stedtli womer ungerwaegs dueregfahre si, chli gneuer agluegt. Si so vo Lima nach Huancayo gfahre, vo dert witer nach Ayacucho, Andahuaylas u schlussendlech uf Abancay. D Landschafte womer passiert hei, si einisch meh, hammermaessig schoen gsi. Hei wider mau so richtig urschpruenglechs Peru choenne erlaebe, was haut immer ds Interessantischte isch am Ganze. Da gsehsch i jedem Doerfli Soei, Chueh, Huehner, Schaf wo eifach frei umeloufe u nid saelte d Schtrass blockiere. De wird de aube aghalte, chli umeghuupet u de wuesse di schlaue Vicher, dass si aeue uf d Site soette. Zwuesch dri schtige de ou immer wider noeii Luet i, wo entweder Laebensmittel am transportiere si oder es Huehn oder weisi nid was ungerem Arm mit i Boes schleppe. D Andrea aus Vegi het mit daem muesse lehre umgah u mittlerwile geit das ganz guet. Me seit sech eifach "andere Laender, andere Sitten"! Ou praktisch i jedem Oertli, choeme Iheimeschi i Boes cho Sache verchoufe. Da chasch vom Cola, bis zume Haerdoepel mit Ei aus zu Schpottpriise ha. Uf dene laenge Boesfahrte soett me ja ou zwuesch dri mau ga bisle. Das isch ja ou es Thema fuer sich. Dr Boes hautet, dr Fahrer chunt cho saege, das me uf ds WC choennt, de schtige aui us (30 Luet oder meh) u naer wird eifach irgendwo ad Schtrass, a Boes oder ane Huusmuur haeregschiffet. Kes Wunder, dases ueberall immer chli seikelet. Interessant si ou immer di vile Vegetationszone, wome uf sore Fahrt duerfahrt. Das ja ueber d Ande geit, geits immer chli ufe u wider abe. Unde isches meischtens eher heiss u sehr troche, maengisch aber ou sehr gruen u fruchtbar u wede wider ufe fahrsch, isches chaut, wulcheverhanget aber aebefalls ou troche. Aebe, wi scho mehrmals erwaehnt, uf sore Boesfahrt wirds eim nie laengwilig...

Witer simer de ids Doerfli Cachora gfahre. Nachdaem ues e Taxifahrer wider mau het abzockt wine Grosse, simer schlussendlech mit eim, wo Torros chouft, ache i das Doerfli gfahre. Ungerwaegs simer de immer wider aghaute, u hei verschideni Torros beguetachtet u dr Anger het Priise verhandlet. Mir si eifach naebe dran gschtande u hei so ta, aus chaeme mer mega druus... Vo daem Doerfli us heimer ues de e Multiertriber u 3 Mulis gmietet u si mit dene Richtig Inkaruine Choquequirao gritte. Fuer di ganzi Tuur heimer 4 Taeg brucht u si isch ungloublech schoen gsi. Insgesamt heimer mit uesne Mulis fasch 4000 Hoehemeter bewaeltiget. Si widerum verschideni Vegetationszone duerritte u genau das, isch ou Tuecke vo dere Route gsi. Mir si 200o Hoehemeter abegloffe, bis zum Rio Apurimac. Dert unger hets di vor Hitz fasch erschlage. Naer simer wider 2000 Hoehemeter ufegritte u dobe isches de ume relativ chuel gsi. Das nimmt eim auso no mit... D Ruine saelber si faszinierend gsi. Eifach zoberscht ufem Hoger, uf guet 3000 m.ue.m. hei d Inkas e rise Stadt bout. Vo dere Stadt isch aber ersch oeppe 30% freigleit, me cha auso saege, dass di Stadt no viu groesser isch, aus mir se hei gseh. Si isch mit Macchu Pichhu absolut verglichbar, nume mitem Ungerschid, dases hie fasch gartis isch u fuer Macchu Picchu oeppe ds fueffache zahlsch! Uesi Mulis hei absoluti Spitzearbeit gleischtet, das isch ds bewundere wi gelaendegaengig die si. Fuer ues isches aber sicher ds erscht u ds letscht mau gsi, dasmer mit Mulis goe, saelber chrampfe isch immer no ds Beschte!

Und itz simer in Cusco, dr Turischtestadt per excellence! Hei wider mau e zuenftige Kulturschock gha, womer vor Pampa i di Stadt si cho. Aber schoen isch si u all Faell, het sehr Stil u mir gniesse wider mau es aschtaendigs Hotelzimmer u ne feini Pizza!