Und da is er

U itz isch nume no d Frag: Wele vo Beidne???????

Isch doch klar wele, oder? Natuerlech heimer ues nid sone Schrottchischte kouft, wi dae chli gaelb, alt, oder aech scho? Uese Daihatsu Feroza 4x4 isch itz guet 3 Wuche mit ues ungerwaegs u sini Gschicht haett scho fasch ime Buech Platz. Kouft heimer ne in Santiago bime Outohaendler, er isch dr Erscht gsi, womer si ga luege u aer het ues mit sim schoene Usgseh aglaechlet. U het is umebracht... Scho witeri 2 Taeg schpeter het aer ues ghoert u scho witeri 2 Taeg schpeter, simer ds erscht Mau mitim Mitz ir Grossstadt blibe stecke, wueu ds Chuelerwasser het kochet! Nachdaem ues e Mech het gseit, dr Chare sig leider nid ime sehr guete Zuestand, simer wuetentbrannt zruegg zum Haendler u heine woeue umegaeh. Het ja, klar doch, ueberhoupt nid funktioniert u ues isch immer meh klar worde, dass is dae Typ uebers Naescht abgschrisse het. Hei ues de aber naer mit ihm ufne einigermasse gueti Loesig choenne einige, aer het dr Schade behobe u no einigi Teili la uswaechsle, natuerlech heimer aber ou no oeppis wenigs muesse dra zahle. E angere Mech hingaege, het ues de wider chli Muet gmacht u gseit, dr Charre sigi itz ime guete Zuestand, mir soeue ues nid so viu Sorge mache. So isch ues nuet angers uebrig blibe, aus eifach Vertroue ds finde u a ueses Oeiteli ds gloube. U itz simer 2 Wuche mitim duer Mittelchile gfahre u aus isch sowit guet gange, Er schepperet eifach hie chli u macht da zwuesch duere es komisches Gruesch aber fahrt u fahrt. Bis uf huet, womer di zwoeiti Panne hei gha. Ues isch uf dr Outobahn umnes Haar ds Vorderrad agheit, aui 5 Schrube si gloest gsi, hei auso es Souglueck gha. Hei zersch gmeint, das sig uf dene Schotterschtrasse passiert, hei de aber naer muesse saege, dass das fasch nid mueglech isch. Denn aui angere Reder si ke Bitz gloest gsi, wahrschinlech het ues muetmasslech oepper oeppis umegschrubt. Hie cha ja itz ds Outo nuet derfuer, aber es geit haut aus itz gliche. Ja nu, itz mache mer ds Beschte drus u hoffe u hoffe.... Itz heimer ou mau Paech gha oder besser gseit, si chli ds naiv a di ganzi Sach haeregange!