Santiago de Chile

Vom Graenzstedtli San Pedro de Atacama simer witer ueber Calama u Antofagasta bis id Houptstadt Santiago. Doch bis der haere isches e laenge u hartnaeckige Waeg gsi. Uesi Bustickets heimer am 22. Dezember in Calama woeue ga choufe, aber wimer du gli hei muesse feschtschteue, het di ganzi Stadt kes einzigs Bilie me uf Santiago gha. So heimer du no e Umwaeg ueber das Antofagasta muesse mache u hei de dert no mit Mueh u Not 2 sehr tueri Tickets uebercho. Acho in Santiago heimer de afa mau paar Taeg miteme zuenftige Kulturschock ds kaempfe gha! Hie hets u gits eifach aus u ds suedamerikanische Feeling, womer itz 6 Moenet i uesem Bluet hei gha, isch uf ds mau verschwunde gsi... So gits hie e Metro, x riisegrossi Buerogebaeude, Shoppingzentre, gschtressti Luet ir Schale, Verchehrsreglae!! u was suesch no so aus ine entwickleti Grossstadt ghoert. Ds Einzige, wo ues no het la gloube, dasmer in Suedamerika si, si di vile fule, flaettende Strassekoeter u d Schuehputzer gsi! Nuet desto Trotz heimer ues d Luune natuerlech nid la verderbe. Schliesslech simer ja dahaere cho, fuer ues e witere Troum ds erfuelle, naemlech es Outo ds choufe. U dir gloubets nid aber mir hei innerhalb vo 2 Taeg, das fuer ues perfekte Outo gfunde u fasch aue Papierchram erlediget gha. U itz simer stolzi Bsitzer vome chilenische Daihatsu Feroza 4x4 mit chilenischem Nummero (Foto folgt). Mir heis fasch nid gloubt, wo mir ds erscht Mau mit uesem eigete Outo duer Santiago si gfahre, das isch es ungloublechs Gfuehl gsi. A dere Schteu wette mir ou no aune danke, wo ues fuer di Aschaffig dr Duume hei drueckt, schiint auso gnuetzt ds ha!

Was Wiehnachte fiire anbelangt, choeimer nid gad viu Speziells brichte. Es isch hie 30 Grad warm, da isch nid gad viu Wiehnachtsstimmig ufcho. So heimer ues eifach es feins z' Nacht goennt u hei no Telefon mit uesen Eltere gmacht, das isch o schoen gsi. Fuer Silveschter heimer de aber scho vor, chli ga ds feschte. Witer im Suede unge soeu schiins e Goaparty schtige, waer haut scho mau wider schoen, so richtig ga ab ds shake. Luege mer mau, wos ues haere verschlat. Nach itz fasch ere Wuche Santiago, heimer ues scho chli a Rummu gwoehnt u es wird langsam wider chli normal. Aber di "stinkende Indianerfroue mit irne riise Roeck, wode eifach mit nuetem chasch us dr Rueh bringe, faehle ues i aune Egge....