Quer durchs Land nach Peninsula Valdes

Nachdaem mir ues i uesem gliebte el Bolson so richtig erholt u Chraeft tanket hei, isches voller Froeid witer gange, einisch quer duer ds Land bis uebere a Kueschte. Agfange het d' Fahrt im Nationalpark los Alerces. Dert heimer wunderschoeni Baergsee choenne gniesse, so wi ds erscht Mau windisches u stuermisches patagonisches Waetter. Es het kuttet, graegnet u doch het glichzitig d' Sunne no gschine, so dass di wunderschoene Raegeboege si entschtande.

Witer isches de 700 km quer duer ds Land gange, gha hets nid nuet, sondern eifach gar nuet. 2 Taeg isches de duer argentinischi Steppelandschaft mit wunderschoene Fluessli, Felsvorschprueng, Gauchos mit irne Ross u ab und zue mau ere Tankschteu wo mit Huehner umgaeh isch gsi, gange! Gwindet hets nume einisch aber zum Glueck heimer Mitwind gha u so gad 2 Liter Moscht choenne spare:-)))!

Ar Kueschte acho, heimer zersch e Stopp im Stedtli Puerto Madryn gmacht. Am naechschte Tag simer de naer uf d Halbinsle Peninsula Valdes gfahre, wo bekannt fuer risegi Seeloeie, Seeelefante u Pinguinekolonie isch. Mit viu Glueck choennt me sogar Orkas ds gseh uebercho, wo zur Zyt ad Kueschte schwuemme fuer chlini Selloeie ds riisse. Uf dr Insle het me mitem Outo e Rundfahrt choenne mache u mehreri Orte ga bsueche. So heimer 2 Seeelefantekolonie, sowie Pinguine u Selloeie choenne gseh. Es isch unbeschriblech wunderschoen gsi, seregi Tier mau vo so nach u vor auem i freier Wildniss choenne ds beobachte. Zu de Pinguine heimer ganz nach zueche choenne, di hei absolut ke Angscht, si si sogar sehr neugierig u choeme immer necher a di haere. Wau isch das es Erlaebnis gsi. Orkas heimer leider kener zu Gesicht becho, isch aber gar nid witers schlimm gsi, si ja schliesslech suesch mit gnue Schoenem verwoehnt worde. Am naechschte Tag heimer ues entschlosse, no mit Seeloeie ga ds schnorchle. Abgseh dervo, das mer wider beidi Seechrank si worde, isches es absolut einmaligs u wunderschoens Erlaebnis gsi. Di Seeloeie si extrem neugierig u nacheme Zytli sisi i Schare um ues umegschwumme, hei ues ade Flosse knabberet, di umegschubst oder sech am Buch la schtrichle. !!Wau!!

Voll mit wunderbare Erinnerige geits itz witer Richtig Suede, Richtig Ushaia. Witer im Suede unge waerde mer vorussichtlech nomau e Halt mache, fuer no Delfine choenne ga ds luege. Suesch waerde mir ir naechschte Wuche dermit beschaeftiget si, di no fasch 2000 km bis ads Aendi vor Waelt zruegg ds lege!