Puerto Deseado

Und itz het di elend laengi Strecki agfange. No gueti 2000 km sis bis Ushaia u di fuehre mehrheitlech ueber di kargi u flachi Landschaft vom patagonische Kueschteteil. Ou dr Wind, wo hie permanent waeiht isch erwaehnenswaert. Wede zum Outo usschtigsch muesch luege, dases erschtens nid di saelber u zwoeitens nid ono d' Outotuer waegluftet. Bim fahre muesch ds Schtuerrad mit beidne Haend haebe, dases di nid vo eire Strassesite zur angere tribt. Kurz bevor mer de ueses naechschte Ziel erreicht hei, heimer no e Argentinier ufglade, wo ou i das Doerfli het woeue. Bi auer Liebe zu sire Gaschtfruendschaft, aber er het ues eifach 1 1/2 Schtund so dr Chopf zuetexschtet, das mir voellig erschoepft u entchraeftet nach 9 schtuendiger Fahrt dert si acho. Ja guet, derfuer wuesse mer itz so zimlech aus ueber di argentinischi Kultur u ueber d' Gwohnheite vode Luet. Das Doerfli het Puerto Deseado gheisse. Hie heimer es witers Mau d' Mueglechkeit uebercho, di vilfaeltegi Fauna rund um ds Meer ga ds beobachte. U mir hei Glueck gha. Waehrend uesere Bootsfahrt hei ues e Moment lang 2 Delfine verfolgt u hei sech ou ab und zue zeigt. Di si jewils wi Pfile naebem oder ungerem Boot duergschwumme, das isch eifach fantastisch gsi. Witers heimer x verschideni Kormoran - und angeri Vogelarte gseh, e witeri Selloeiekolonie u Pinguine soweit das Auge reicht. D' Kueschte vo Argentinie isch eifach genial. U obwohl d' Landschafte sehr flach u karg si, chas doch ou sehr schoen si. Zum Bischpiu d' Sunneungergaeng oder d' Wulche si hie absolut einmalig. D' Andrea isch mittlerwile e absolute patagonische Wulchefan!! Ame witere Tag simer ane angere Kueschteteil gfahre, wo Cabo blanco het gheisse. Ou dert hets nomau Seeloeie ds gseh gae, es het hie ueberau so viu vo dene Vicher, dases scho bau normal isch, weme se ds Gsicht ueberchunnt.

Viu meh heimer im Moment gad nid ds brichte, si haut sehr viu im Outo u liire Kilometer uf. Scho gli simer dunge - mir froeie ues risig uf ds Erreiche vor suedlechschte Stadt vor Waelt!