Punta Arenas und Autoverkauf

Vor suedlechschte Stadt vor Waelt, simer witer i di suedlechschti Stadt vo Chile gfahre. Das isch vorussichtlech di letschti Fahrt mit uesem Outo gsi, da mir gnue vo Outogschtuerm hei u dr Chare itz in Punta Arenas wei verchoufe.

Mittlerwile isch dr 14. Maerz u mir si immer no da. Ganzi 2 Wuche simer itz hie u hei probiert ds Outo ds verchoufe. Es het viu Naerve u vor auem Geduld koschtet, doch zum Glueck heimer e super Hostalbsitzer gha, wo ues viu het ghulfe u ues taeglech im Dilemma het ungerstuetzt... Nachdaem Zytigsinserat, se vende Schildli hinger ar Outoschibe u ir Stadt ume fahre aus nuet het gnuetzt u dr Chare eifach niemer fuer uese Priis het woeue, isch uesi auerletschti Chance no dr Outohaendler gsi. U dae het ues innerhalb vo paar Schtung e jungi Frou gfunde, wo uses Outo wott choufe. Haut leider zume schlaechte Priis aber itz, Houptsach er isch waeg. No am gliche Tag heimer mit dere uf ds Notariat woeue um di Sach ds erledige. Doch dummerwiis het di gueti Frou nume e Schegg gha u aui Banke hei gad vo eire Schtung zue ta gha, so dass mer dae Schegg itz ersch am Maentig choei iloese. Mir hoffe itz eifach, dass nid no oeppis derzwuesche chunnt u sechs die nid no angers ueberleit!

Ds grobe Fazit us dere ganze Outostory isch: E Outochouf isch uf jede Fall besser aus eine ds miete, doch muesch eifach ganz viu Zyt u Geduld iplane, muesch Naerve wi Drahtseili ha u de chasch de schlussendlech scho fasch saege, gang gschider vo Afang a mitem Boes, da hesch ke Verantwortig u chasch eifach nume inehocke u es fahrt.

Uf jede Fau heimer nomau ganz viu ueber d' Kultur vo de Suedamerikaner choenne lehre, maengisch heimer ueber se glachet maengisch heftig gschumpfe aber glich mues me se eifach gaern ha!!

Punta Arenas saelber isch nuet waeltbewegends, ganz e normali Hafestadt, shet viu Seemaenner u daementspraechend ou viu Night Clubs! Gmacht heimer nid viu angers, aus zwueschem Internet, em Fernseh, em Bett u dr Chuchi ds paendle. Doch mir fuehle ues i daem Hostal hie total wohl u mir hei viu Spass mit de Bsitzer. Kusi isch letscht Samschtig mit dr ganze Tschuppelete i Usgang (inkl. dae Hostalbsitzer) u si heis gloub ziiimlech luschtig gha!! Was fuernes Aendi di ganzi Gschicht no wird naeh, erfahret dr de im naechschte Bitrag.