Torres del Paine

Mir si zruegg, vo uesem bishaer lengschte u intensivschte Trek. Uesi Wanderig het ganzi 8 Taeg duuret u mir hei insgesamt guet 95 km zruegg gleit. Gwanderet simer im Nationalpark Torres del Paine, dae ligt im patagonische Chile u me seit, er sig eis vo de schoenschte Wandergebiet in ganz Suedamerika. Torres heisst soviu wi Tuerm u vo dene Tuerm gits e ganzi Maengi. Ds spezielle a dene Tuerm isch, das si so extrem spitzig si u waege daem natuerlech bsunders atraktiv usgseh:-)
Im Gebiet saelber ligt ou dr Afang vom patagonische Inlandiis, wo schiins e Flechi soeu ha, wo groesser isch aus di ganzi Schwyz. Auso Gletscher so weit das Auge reicht. Mir si du gschtartet u scho gli het sech herusegschteut, das di Wanderig e aechti Heruseforderig wird waerde. U zwar nid eigentlech waeg de laenge Streckine u em vile loufe, sondern viu meh waeg em Klima wo hie herrscht. Dases ja in Patagonie viu Wind, Raege u Minuteschnaeui Waetterwaechsle git merkt me gli mau, aber weme de daem Watter mau so richtig usgsetzt isch, weis me de ersch raecht, was das eigentlech beduetet. So hets de a uesem zwoeite Wandertag nume einisch gschiffet u mir hei eifach ghoffet, das uesi Usrueschtig gnue guet isch, fuer daem standdshaute. Bis uf d' Rucksackraegehuelle vor Andrea isch aus meh oder weniger dicht gsi, doch isch du aebe leider dr Schlafsack, womer vergaesse hei ine Plastiksack ds verpacke, relativ nass worde. Zum Glueck hets i daem Camping womer uebernachtet hei es Huesli mit Holzofe gaeh, womer uesi Sache stundelang dervor hei choenne troechne. Am naechschte Tag isches de ume schoens Waetter gsi u mir hei ues ufne trochne Tag gfroeit. Doch perfekt isches ja bekanntlech nie u drum het ues ou scho gli dr Wind afa plage. Mir si ueber nes chlises Paessli gloffe u dert obe het e Wind blase, wi mirs beidi no nie hei erlaebt. Er isch i Boehe cho, het sicher e Gschwindikeit vo fasch 100km/h druf gha u het di fasch vom Waeg blase. Me het auso aernschthaft muesse luege, dasme nid dr Baerg ab purzlet. Dae Tag isch de ou vor Strecki haer dr aschtraengenscht vo aune gsi, si fasch 12 Stund gloffe u hei natuerlech am Abe einigi schoen schmaerzendi Blaetterli ade Fuess gha. I de witere Taeg heimer de naer chli e hoechere Pass ueberquert u hei hinger unge de ds erscht Mau ds Inlandiis choenne gseh. Dae Gletscher dert heisst Glaciar Grey u isch eifach gewaltig. A sim Aendi geiter diraekt ine See u i daem See schwuemme ou stanedig irgendwelchi Iisbaerge drin ume, wo vom Gletscher abbroche si. U ds wuerklech abartige isch ja, das du diraekt naebem Gletscher Wald hesch, das bringt es schwyzer Oug scho chli duerenang! Dr Waeg isch witer gange aus em Gletscher u sim Gletschersee entlang, bis fuere zume relativ moderne Hotel, wo aextra fuer di Luet bout isch worde, wo nid wit moege loufe, nume mitem Schiffli wei haere gfahre waerde, dert einisch uebernachte, am naechschte Tag chli ga wandere u de mitem Boetli wider zruegg goe. Toent chli abschetzig weis scho aber wede aube so i dim Wander -u Naturfilm inne bisch u naer ploetzlech wider soviu Luet u Comfort um di hesch, fat di so Zueg afa naerve. Nichts desto Trotz simer witer gloffe u hei di naechschte Zagge u Gletscher choenne beschtuune. Ds Waetter hets ou meh oder weniger guet mit ues gmeint u mir si nume no saelte nass worde. U so, si di 8 Taeg mega schnaeu verbi gange, mir si wider richtig igloffe u froeie ues scho wider ufe naechscht Trek.
U itz chunnt mer gad i Sinn, das mir oeich no e Antwort waeg uesem Outo schuldig si. Ja richtig, verchouft ischer immer no nid, di Angeri wone het woeue choufe u dr Schegg scho ide Finger het gha u mit ues scho vorem Notariat isch gschtande, het sechs denn ueber ds Wucheaend tatsaechlech no angers ueberleit u het is naer am Maentig gseit, si woeu ne itz doch nid choufe, si heig leider ke Gaeld!! Was dr wuerklech Grund isch, dass si ne nid het woeue, wuesse mer nid. Mir uf jede Fall, fahre itz dermit Richtig Norde, machenis so wenig Gedanke wi mueglech u we dae Cheib irgendwo abligt de soeuer!!! Mir hei ja hie in Suedamerika glehrt: No te preocupes es chunnt aus guet!