Patagonische Gletscherwelten

Nach uesere laenge Wanderig in Chile isches witer gange Richtig Norde u wider uebere uf Argentinie. D' Graenzueberquerige zwuesche Chile u Argentinie ghoere scho bau zu uesem Reisealltag, mittlerwile simer scho ds dritt mau in Argentinie. In el Calafate, es tuers Turischtekaff, simer dr waeltberuehmt Perito Moreno Gletscher ga aluege. Leider hets dr ganz Tag gschiffet wi us Chueble u isch mega chaut gsi. Dr Gletscher saelber isch eifach gewaltig, er isch dr waeltwit eifachscht zuegaenglechscht Gletscher u ou dr einzig Gletscher, wo no immer a Groesse zuenimmt. Er muendet direkt ine See u siner Zacke si bis zu 60 Meter hoech. Je nach Tagesliecht aendere ou siner Farbe, was mir aber bi daem mise Waetter nid hei choenne gseh. Derfuer isch waehrend daem mir dert si gsi, einisch e rise Iisbrocke abbroche u unge i See gstuerzt. Super gsi dae Ablick. Vom dazuegehoerige Stedtli el Calafate simer de naer scho gli witergfluechtet, das isch is de doch ds tuer u ds luxurioes gsi, eifach so gar nuem Argentinie. Nume fuer Turis gmacht. So simer witer gfahre uf el Chalten. Das Doerfli, wo nid viu meh aus paar hundert Iiwohner zeut, isch ersch im 1985 usem Bode gstanzt worde. Isch auso chli oeppis ueber 20 jaehrig u no immer nid fertig. Ueberau sisi noeii Huesli u Hostel am haereschteue, teilwiis mit abentuerleche Boumethode (Aluminiumchlaeber zum isoliere). Dert heimer ues de gad sofort sehr wohl gfuehlt. U dert heimer de ou d' Mueglechkeit gha, e Iischlaetterkurs ds mache. Jupidu, mir hei wider mau choenne d' Stigise montiere u ufeme Gletscher ga umetschaupe. Miteme Baergfuehrer simer de fuer 2 Taeg ga lehre chlaettere!!! Ds Waetter hets einisch meh superguet mit ues gmeint u sech vor auem am 2te Tag vor beschte Site zeigt. Normalerwiis windets dert obe permanent u d' Gipfle vom beruehmt beruechtigte Fitz Roy u em Cerro Torre si fasch immer ide Wulche verhuellt. Doch a uesem zwoeite Tag simer mit staublauem Himmu, windstillem Ambiente u agnaehme Temperature verwoehnt worde. Dr ganz Tag heimer im Vordergrund vom Cerro Torre choenne chlaettere, eifach uberwaeltigend isches gsi. Gchlaetteret simer ide Zagge vome Gletscher, hei ues choenne i Felsspaelt abseile u hei Technike zum sichere u chlaettere glehrt. Gad eifach isch di ganzi Musig ja nid aber mir hei itz mau e Idee uebercho, wisech das so afuehlt. Mued u mit Muskukater ide Arme simer zruegg gkehrt ids Doerfli u hei dert no e Tag usgspannet. Eifach schad, dass mir ueses Outo nid in Argentinie choei verchoufe, denn i dere Zyt womer hie si gsi, hei ues x Luet dae Chare woeue abchoufe u zu Prise wo mir ues nume choei ertroeime.
U itz isches ar Zyt, Patagonie langsam ds verlah u drum waerde mir itz zimlech zuegig Richtig Norde fahre. E Teil simer de no uf dr Ruta 40 gfahre, das isch e Schtrass, wo vom Norde vo Argentinie bis i Suede vo Argentinie geit u nume zu wenige Prozent teeret isch. D' Pischtene si daementschpraechend schlaecht u nes Ueberlaebenstrainig fuer e jede Pneu. Drum hei mir ues vorhaer no mit 2 noeiere Pneus ideckt. Bis itz isch aber aus guet gange u sogar dr auerschlechtischt, dueregrapset Pneu hinge links, isch no nid kaputt gange. Holz alaenge... D' Ruta saelber isch eher laengwilig gsi, haut wider grau-grueni Steppe une Wind, wodi wahrhaftig fasch us de Socke hout. Mittlerwile simer scho wider in Chile, im Doerfli Chile Chico u es faehlt ues no e chline Bitz idi naechschti grossi Stadt, womer uese Outoverchouf nomau ds Graechtem waerde ufnaeh. Bis denn hoffe mer uf gueti Strasse u kene Pannene. Machets guet!