Adios Patagonia, ab an die Waerme

Sit uesem Iischlaetterkurs isch scho ume einiges passiert. Mir si witer greist, immer meh Richtig Norde. Ume einisch zur Abwaechslig heimer di chileneschi Graenze ueberquert u si so uf dr Carretera Austral glandet. Das isch di chileneschi Usfuehrig vor Ruta 40 in Argentinie, nume si d' Schagloecher vor Strass no chli groesser u toeifer. Derfuer isch si landschaftlech gseh um einiges schoener gsi. Mir si duer di chaute Raegewaelder vo Patagonie gfahre, aus isch dicht bewachse gsi u sogar Bambus gedeiht hie. Im Doerfli Puerto tranquilo heimer de e Haut igleit. Ds Oertli het vilech so um di 100 Iiwohner u d' Luet si is raecht urchig vorcho. Viu schaffesi hie no mit Ross, tuee Chueh u Schaf zaemetribe u laebe extrem abgschide. Mir hei ues maengisch gfragt: "wi chame hie nume laebe?" Ussert irne Vicher, enang ur Natur heisi dert eifach wuerklech gar nuet. Mir hei du dert no e Usflug zu Marmorhoehline gmacht, das isch ou ganz imposant gsi. Witer isches de naer nach Coyhaique gange. Ungerwaegs uf dr Strass heimer doch ame Gaucho (Mann auf Ross) bime Haar uese Chare verchouft. Isch e souluschtegi Szene gsi. Coyhaique isch du wider mau chli e groesseri Stadt gsi. Hei ues hie bime eltere Paerli iquartiert, di si ues ou wider behilflech bim Outoverchouf gsi. U me gloubts fasch nid. Innerhalb vo 2 Taeg, bzw. innerhalb eire Schtund, heimer uese Chare ame Outohaendler choenne verchoufe. Juhuiiii, dae Cheib simer los! Gli drufabe simer du im Boes Richtig Norde ghocket u mir hei ues richtig gfroeit uf di laengi Boesfahrt. Zwar heimer du no e unerwuenschte Stop in Osorno (Chile) muesse ilege u di glichi Strecki zwoeimau am Tag abfahre aber das isch wider e angeri Gschicht u schlichtewaeg eifach ds laeng fuer hie ds erwaehne... Nachere fasch 3 taegige Boesfahrt, guet 3000 km u strapaziertem Sitzlaeder simer puenktlech zum Geburi vor Andrea ir Houptstadt vo Argentinie, in Buenos aires, acho. Ungloublech das uese Plan so isch ufgange, womer doch am Afang so viu Schwirigkeite bim Outoverchouf hei gha! Buenos aires isch e absoluti Hammerstadt u sprueht nume so vor Energie. Itz simer aber scho wider witergreist u si in Uruguay glandet. Mir waerde aber nomau zruegg uf Buenos aires ga, wueu mer der no e gueti Kollegin, d' Sarah, waerde traeffe. Somit gits de speter me ueber Buenos aires. Uruguay isch e voellegi last minute Entscheidig gsi, mir wuesse so guet wi nuet ueber das Land, mir loe ues eifach la ueberrasche!!