Cotopaxi 5987 m.ue.m

Ja, itz chunt haut scho wider sone Baergbricht, si da chli i uesem Element. Kusi het das ja aube scho dahei gseit, das er de dr hoechscht aktiv Vulkan vor Waeut in Ecuador wott ga beschtige u ig ha immer gseit, schpinsch eigentlech, dae isch ja fasch 6000 m hoech. Ja, naer bisch in Ecuador u es packt di eifach u bis ds letscht wosch da ufe! So simer de ou ufe! Dae ganz Trip heimer i 4 Taeg gmacht, das mer ues ou guet hei choenne aklimatisiere.

1. Tag: Am 10ni am Morge isch das Ganze in Quito losgange u mir si vom Eduardo em Organisator i Nationalpark vom Cotopaxi gfahre worde. Dert heimer de uesi erschte 3 Schtung Wanderig i Agriff cho bis mer di daem haerzige chline Refugio uf knapp 4000m si acho. Dert simer afa mau aus erschts vo zweni no ganz junge Huend begruesst worde u Kusi, dir wuessts ja, het sofort dr Narre a denae graesse gha und umgekehrt natuerlech o! Nachere Sterchig mit Popcorn u Tee heimer de uesi Zimmerli choenne bezieh. Si du naer no chli d Umgaebig ga uskundschafte u nacheme gmuetleche Abe vorem Cheminee scho gi ga pfuuse i das schoene ungheizte chaute Huesli.




2. Tag: Bi absolut gruusigem (wider mau) u chautem Waetter, heimer dr Morurco aus Uebig umrundet. Uese Guide, wo uebrigens i Gummischtifu isch cho, het ues oeppe 5 Schtung lang duer Naebu u Schnee gfuehrt, auso schoen ischs ja nid gad gsi. Aber so nach paar Schtung hesch di a di chaute Zaeie, Haend usw. gwoehnt gha. Si du naer froh gsi, wider im einigermasse warme Huesli ds si, aber ues hei schoe es paar Sorge plaget, naemlech was mer mache, we das bloede Waetter nid besser wird.




3. Tag: Dae heimer ganz ruehig choenne aga, hei nume 3 schtuendegi Wanderig ids Base camp vor ues gha. Am Morge heimer uesi Usrueschtig no vervouschtaendiget mit Picku, Stigise u Seili u hei naer uf ds schoene Waetter gwartet. Am Nami simer du los, duer di kahle aber trotzdaem sehr schoeni Vulkanlandschaft. Am Abe hets de no e Pasta gae, natuerlech mit viune Zibele mmmhhh, noe es Cocateeli u naer simer ab uesi Penntuetene u haette soeue schlafe. Er Andlae iri Fuess si leider nid warm worde bis Mitternacht u gloub ou Kusi het nid gad dr bescht Schlaf gnosse!




4. Tag: Am 23.30 Uhr simer scho wider uf, hei no churz oeppis zmoergelet u si naer i derae schtaerneklare u chaute Nacht losgloffe Richtig Gipfu. Nachere Schtung heimer uesi Stigise montiert u si naer witeri 5 Schtung ufegloffe bis zum Gipfu. Es isch eifach nume einisch schteil gsi u das Ganze e huere Chrampf!!!!! So uf de letschte Meter het me de vo ds hingerscht, wo Kusi isch agseilet gsi, ab und zue mau es Gfluech ghoert, er het gloub e chlineri "Chaeute u Hoeheidiotie" verwuetscht! (gaeu Ivo u Arae, dir wuesst ja vo was mir da redae) Am Morge am 7bni simer Dobe ufem Gipfu acho i hei bi super Waetter e super Ussicht choenne gniesse, si aber doch gaern wider abe, irgendwie ischs eim uf fash 6000 m nuem so wou! So isch du aus wider abe gange, d Bei hei afa nuem so moege aber mir hei bisse u bisse! Gaeg di eufi am Morge simer wider im Refugio gsi u si aus erschts afa mau chli ga pfuuse, hei ja chum no choenne grad schtah! U da em Organisator sis Outo no vor Polizei isch beschlagnahmt worde, heimer schlussendlech no so ime schis Houperboes bis uf Quito muesse zrueggfahre! I gloub so guet u schnaue heimer aeuae scho lang nuem gschlafe. !!Hammererlaebnis!!