Cuenca

Nachem Schtrandlaebe hets ues de doch wider id Ande zoge u mir si ir Stadt Cuenca glandet. Me seit dere Stadt nache, si sig di heimlechi Kulturhouptstadt vo Ecuador und ungerscheidet sech so oder so vo angerne Orte im Land. Si du acho u hei gad uf Ahieb es superguenschtigs Hostal gfunde, mit sehr naette Bsitzer. Ungloublech, wi hiufsbereit di Luet hie si! Gad a uesem erschte Abe simer i eini vo dene vile Bars gange u hei gschtuunet wi viu Gschmack di Luet hie hei, isch mega gmuetlech hie u aus schoen agrichtet.
Hei du naer i dene 7 Taeg womer si blibe, einigi Usflueg gmacht. Si so zum Bischpiu uf Ingapirca gfahre wo e auti Inkaruine schteit (oder besser gseit d Ueberraeschte dervo). Ire Fuehrig heimer de einiges meh ueber d Inkas u d Cañaris erfahre, ds eigentlech Schoene a daem Tag isch aber ersch naer gfougt, hei e chlini Wanderig rund um d Ruine gmacht u wider mau di schoeni Landschaft vo de Ande beschtuunet. Si haut nid so di Historisch aghuuchte! E witere Usflug heimer i Nationalpark el Cajas gmacht, wo widerum bildschoeni Natur ds biete het gha. Glasklari Lagune, Andegras am Meter u vili Voegu hets dert gha. Si widerum oeppe 5 Schtund dert umekrakslet, so schoen isches gsi. Gaern waere mer chli lenger blibe mitem Zaeut aber da ds Waetter oefters sehr schlaecht isch dert, empfaelesis nid, da me schnaeu d Orientierig cha verliere. Witer simer ids Oertli Baños gfahre, wos Thermalquelle het u wome cha baedle. Das isch de aber wider mau chli e Reinfall gsi, Thermallbeder hets scho gha aber es heisech x Ecuadorianer dert drin badet u Fun gha u gschwumme..., das mers de hei la si. Isch so typisch Ecuador, am Wucheaend goe si sech ga amuesiere u veranschtalte es rise Chaos u niene hesch me dini Rueh! De simer de no ufe Sunntigsmarkt vo Chordeleg und Sigsig aber ou dert heimer nid das atroffe, womer hei erwartet. E Maerit hets kene gae, eifach Gschaefter wo hei offe gha. Sehr viu Gold u Silberprodukt heisi dert zu Schpottprise verchouft. Und huet isch itz dr Tag, womer Abschied naeme vo Cuenca und ou vo Ecuador. Hei vor, ueber d Nacht i oeppe 9 Schtund uebere uf Peru ds fahre. Hoffentlech verwuetsche mer e einigermasse noeie Boes u vor auem chli e gsittete Boesfahrer, was haut leider relativ saeute isch hie!!! Aber dr Moensch gwoehnt sech ja fasch a aues. Viva Ecuador, isch mega schoen gsi hie!